Óvissustigi á Vestfjörðum aflýst.
Veðuraðstæður og veðurspá fyrir Vestfirði hafa batnað. Nú hefur kólnað í veðri og úrkoma breyst í snjó. Snjóföl virðist vera yfir öllum Vestfjörðum núna eftir nóttina.
Veðurspáin fyrir næstu daga er ágæt þó gul veðurviðvörun sé í gildi fram eftir degi á norðan og sunnanverðum Vestfjörðum og síðan áfram á Ströndum.
Áfram heldur Vegagerðin að hreinsa aur af veginum um Eyrarhlíð, vegrásir og nánasta umhverfi. Vegfarendur um þann veg eru hvattir til þess að sýna þeim sem þar eru að vinna tillitssemi.
Þá eru allir vegfarendur sem ætla sér að aka milli byggðagjarna að huga áður vel að veðuraðstæðum á vegi og veðurspá, sjá hlekkina hér að neðan.
umferdin.is/
www.vedur.is/vedur/spar/stadaspar/vestfirdir/
Óvissustig almannavarna.
Hvað merkir það ?
Fyrir áhugasama þá merkir Óvissustig eftirfarandi:
www.almannavarnir.is/almannavarnarstig/stig-alvarleika/
Veður og aðstæður á Vestfjörðum – Óvissustig enn í gildi.
Veðrið er að ganga niður. Úrkoma virðist verða minni en spár gerðu ráð fyrir. Vegir um Vestfirði eru flestallir færir, utan Snæfjallastrandavegar. En þar er Vegagerðin að vinna að viðgerðum til bráðabirgða.
Veginum um Eyrarhlíð, milli Hnífsdals og Ísafjarðar, var af öryggisástæðum, lokað í nótt sem leið en var opnaður á ný í morgun. Ekki er gert ráð fyrir því að honum verði lokað aftur, ekki nema aðstæður breytist fljótt.
Vegfarendur um Eyrarhlíð, Súðavíkurhlíð, Raknadalshlíð og um aðra vegi undir bröttum hlíðum eru hvattir til þess að aka með varúð.
Einnig þarf að hafa í huga að á nokkrum stöðum hafa vegaskemmdir orðið vegna vatnavaxta og Vegagerðinni ekki gefist ráðrúm til að framkvæma fullnaðarviðgerðir.
Enn er jarðvegur mjög blautur og enn er vatn að renna niður brattar hlíðar og hvatt er til þess að aðgát sé höfð og að fólk sé ekki í fjallgöngu í bröttum hlíðum í þessum aðstæðum.
Veðurstofa Íslands hefur gefið út gular veðurviðvaranir fyrir daginn í dag og á morgun, eins og hér segir:
Gul veðurviðvörun á Ströndum í dag milli 08:00-16:00 í dag (fimmtudag).
Suðvestan 15-23 m/s og vindhviður yfir 30 m/s. Varasamt ferðaveður, einkum fyrir ökutæki sem taka á sig mikinn vind.
Gul veðurviðvörun á sunnan og norðanverðum Vestfjörðum morgun, föstudaginn milli kl.07:00-15:00
Norðan hvassviðri, 15-20 m/s og snjókoma með lélegu skyggni og versnandi akstursskilyrðum. Varasamt ferðaveður.
Hvatt er til þess að þeir sem eiga leið milli byggðakjarna á Vestfjörðum afli sér upplýsinga í síma Vegagerðarinnar, 1777 og eins á vefsiðum hennar og Veðurstofu Íslands, sjá hér að neðan.
www.vedur.is/vidvaranir
umferdin.is/kafli/90708
Meðfylgjandi mynd var tekin úr lofti af veginum um Eyrarhlíð í Skutulsfirði í gærdag. Fengin að láni hjá starfsfólki Veðurstofa Íslands En þar má sjá nokkra vatnsfarvegi úr hlíðinni ofan vegarins og einnig hvernig eitt af aurflóðunum sem þar féllu fór yfir veginn.
Vegagerðin vinnur enn að hreinsun vegarins og eru ökumenn hvattir til þess að sýna sérstaka tillitssemi og aka með varúð, en þó hiklaust.
Vakin er athygli á því að vegurinn um Eyrarhlíð milli Ísafjarðar og Hnífsdal er ekki í fullri breidd á öllum þeim stöðum sem aurskriðurnar féllu í gær. Vinsamlegas sýnið aðgát.
Veginum verður eins og áður hefur verið sagt, lokað á miðnætti og staðan tekin í fyrramálið.
Sem fyrr er bent á www.umferdin.is fyrir færð á vegum.
